საიდან მოდის სააღდგომო პასკის ტრადიცია და როგორ მოვამზადოთ ის ყველაზე გემრიელად

პასკას ქრისტიანები სააღდგომოდ აცხობენ და მიირთმევენ იესო ქრისტეს აღდგომის რწმენის ნიშნად. იგი არის იმ მთის სიმბოლო, რომელზეც ჯვარს აცვეს იესო ქრისტე. პასკა აგრეთვე აღდგომის სიხარულისა და ქრისტიანთა ერთობის სიმბოლოა. პასკა ტკბილი პურია. უფალი ამბობს: „მე ვარ პური ზეცით გადმოსული". საზიარებელი ღვინო და პური, ღვთის მადლად იკურთხება და უფლის სისხლად და ხორცად გარდაისახება. აღდგომის სიხარულთან ერთად პასკა ასევე ზეციური საზრდოს სიმბოლოა ადამიანის სულისთვის.

ჩვენ პასკას ძირითადად, საფუარის გამოყენებით ვაცხობთ. ამ მხრივ გარკვეული განსხვავება არსებობს დასავლეთისა და აღმოსავლეთის ეკლესიებში. დასავლეთში უსაფუარო კვერის გამოყენების ტრადიცია შეინარჩუნეს (ებრაელებს აკრძალული ჰქონდათ მისი საფუარით მომზადება), აღმოსავლეთში კი გაფუებული კვერის გამოყენების ტრადიცია შემოვიდა.

აღდგომის დღესასწაული პასკის გარეშე წარმოუდგენელია. ბევრ ოჯახში მისი ცხობის ტრადიცია უკვე თაობებია დამკვიდრდა.

გთავაზობთ კლასიკური პასკის ერთ-ერთ საუკეთესო რეცეპტს :

ინგრედიენტები:

• 500 მლ. რძე
• 500 გრ. შაქარი
• 2 ს/კ არაჟანი
• 8 ცალი კვერცხი
• 500 გრ. კარაქი
• 250 გრ. ქიშმიში
• ჩ/კ მარილი
• კგ. ფქვილი
• ს/კ მშრალი საფუარი
• ს/კ დაფქული ჯავზი/მუსკატი
• ს/კ დაფქული ილი(კარდამონი)
• 1⁄4 ს/კ დაფქული კოჭა
• 1⁄2 ჭიქა ზეთი

პასკის მომზადების ეტაპები:

• აურიეთ ცოტაოდენი ფქვილი საფუართან ერთად, შეურიეთ თბილი რძე (რომელშიც 2 ჩ/კ შაქარი იქნება გახსნილი) და თანდათანობით შეათქვიფეთ ფქვილი ისე, რომ მიიღოთ დაახლოებით არაჟნის სისქის ცომი. დააფარეთ და გადადგით.
• ათქვიფეთ კარაქი, მარილი და შაქარი, დაუმატეთ კვერცხები, არაჟანი და სუნელები;
• როცა ცომი ამოვა, შეურიეთ კარაქის ნაზავი და დაუმატეთ იმდენი ფქვილი, რომ მიიღოთ რბილი ცომი;
• ცომი თბილ ადგილას მოათავსეთ და დაელოდეთ აფუვდეს. როდესაც ამოვა, ხელები ზეთით დაისველეთ და ჩაზილეთ. ეს პროცესი ორჯერ გაიმეორეთ და შემდეგ ისევ აცადეთ რომ ამოფუვდეს;
• როდესაც ის მესამეჯერ აფუვდება, დაუმატეთ ქიშმიში და გადაიტანეთ ფორმებში. თუ გინდათ, რომ ქიშმიში თანაბრად იყოს პასკაში განაწილებული, სანამ ცომს დაუმატებთ გარეცხეთ, გაამშრალეთ და ცოტაოდენი ფქვილი მოაყარეთ; (ფორმებს შიგნიდან პერგამენტი უნდა შემოახვიოთ). ცომი ფორმების მხოლოდ 2/3 უნდა ფარავდეს.
• შემდეგ ცომი კვლავ თბილ ადგილას დადგით და დააცადეთ ფორმებშივე აფუვდეს. როცა ცომი ამოვა, გადაიტანეთ ღუმელში და აცხვეთ საშუალო ტემპერატურაზე.

გაგვიზიარეთ თქვენი პასკის რეცეპტიც, იქნებ ჩვენსას ჯობია