ჰელოუინი - როგორ აღნიშნავენ „ყველა წმინდას“ დღეს

ბევრი ადამიანისთვის ჰელოუინი საყვარელი დღესასწაულია - თავგადასავლებითა და რიტუალებით სავსე, როცა ღამე ბნელია და სავსე ბოროტი სულებით. ბევრი მათგანი ამ დღეს განსაკუთრებულ რიტუალს ასრულებს და ენთუზიაზმით ერთვება გასართობ ღონისძიებებში.

ჰელოუნის აღნიშვნის ტრადიცია ძველი კელტებიდან მოდის. თავდაპირველად აღინიშნებოდა დიდი ბრიტანეთისა და ჩრდილოეთ ირლანდიის ტერიტორიაზე. დროთა განმავლობაში კი მიგრანტების ნაკადის ზრდასთან ერთად აშშ-სა და სხვა ქვეყნებშიც გავრცელდა.

ჰელოუნის დღესასწაული თავდაპირველად დიდი ზამთრის დასაწყისს უკავშირდებოდა. 609 წელს კი პაპმა ბონიფაცი მეოთხემ 1 ნოემბერი ყველა წმინდანის დღედ გამოაცხადა. ასე დაუკავშირდა ერთმანეთს კელტური და ქრისტიანული რელიგიები და დაიწყო All Hallows Even - ყველა წმინდანის ღამის აღნიშნვა. გავრცელებული რწმენის თანახმად ამ ღამით ბოროტი სულები გარეთ გამოდიან, ადამიანებმა კი ისინი უნდა დააფრთხონ საშიში კოსტიუმებითა და ატრიბუტიკით.

მიუხედავად იმისა, რომ ჰელოუინი ოფიციალურ დღესასწაულად არსად გამოუცხადებიათ, უკვე საუკუნეებია, აშშ-სა და ევროპის (და ახლა უკვე საქართველოსიც) ახალგაზრდები დიდი ენთუზიაზმით ეკიდებიან მას და სპეციალურად ემზადებიან, სხვადასხვა საშიში კოსტიუმის შეძენითა, თუ ინტერიერის სპეციალური გაფორმებით ბოროტი სულების დასაფრთხობად.

რას უკავშირდება გოგრის რიტუალი

გოგრის სიმბოლოს დიდი ისტორია აქვს. მას ჯეკის ლამპას უწოდებენ. მთლიან გოგრაზე კვეთენ ბოროტ გრიმასას და მასში სანთელს ანთებენ. ფიქრობდნენ, რომ ის სახლთან მიახლოებულ ბოროტ სულებს განდევნიდა. თუმცა სანამ ჯეკის ლამპას ჰელოუინს დაუკავშირდებდნენ, მას ძველი ბრიტანელები საუკუნეების წინ იყენებდნენ მოსავლის აღების დროს. პოპულარული ირლანდიური რწმენის თანახმად კი ეს არის სული, რომელიც არც სამოთხეში მიიღეს და არც ჯოჯოხეთში.

მასკარადი

ჰელოუინის მეორე მნიშვნელოვანი ატრიბუტი კოსტუმირებული შოუა. პოპულარულია საშინელებათა კლასიკური ფილმების პერსონაჟები, როგორებიცაა მუმია, ფრანკენშტეინი, დრაკულა და ა.შ. მნიშვნელოვან როლს ასრულებს შემოდგომის სიმბოლოებიც, მაგალითად ხის საფრთხობელა. ძირითადი თემებია: უწმინდური ძალები, სიკვდილი, ოკულტიზმი და მონსტრები. მთავარ ფერებად შავი და სტაფილოსფერი ითვლება.

ტკბილეულის შეგროვების ტრადიცია Trick-or-treat

აღნიშნული ტრადიცია ევროპაში ჯერ კიდევ შუა საუკუნეებში ფიქსირდებოდა. თუმცა მაშინ ღარიბი ადამიანები კარდაკარ ტკბილეულის სათხოვნელად შობას დადიოდნენ. უკვე მოგვიანებით ის ჩამოსცილდა შობას და იქცა ჰელოუნის ტრადიციულ რიტუალად. გამოთქმა Trick-or-treat გულისხმობს ხუმრობას, რომელშიც იგულისხმება, რომ თუ მასპინძელი სტუმარს არ გაუმასპინძლდება, ის მას რაიმე სახის ზიანს მიაყენებს.

სადღესასწაულო სუფრა

ტრადიციულად ჰელოუნისითვის სუფრას სხვადასხვა ტკბილეულით, კოქტეილებით, კანფეტებითა და წასახემსებლებით აწყობენ. რა თქმა უნდა, გოგრა აქაც სუფრის აუცილებელი ატრიბუტია. მნიშნველოვანი კი ის არის, რომ ტკბილეულს ჰქონდეს საშიში ფორმები: სისხლიანი თითების, თვალის გუგის, ვამპირის ეშვებისა და ა.შ.

თუ თქვენც ბრძანდებით ამ სანახაობებითა და რიტუალებით სავსე დღესასწაულის მოყვარული, აღიჭურვეთ საშიში კოსტიუმებითა და გოგრის ლამპებით და დაიწყეთ ზრუნვა შთაბეჭდილებებით სავსე ჰელოუინის ღამის გასატარებლად, 31 ოქტომბრის ღამეს.