სააღდგომო კვერცხის შეღებვის საუკეთესო მეთოდი

კვერცხი – აღდგომის სიმბოლოა. ტრადიციისამებრ მას ეკლესიაში აკურთხებენ, მიაქვთ ახლობლებისთვის, ურიგებენ გაჭირვებულებს. გადმოცემის მიხედვით კვერცხს თავდაპირველად მხოლოდ წითლად ღებავდნენ. შემდეგ კვერცხის სხვადასხვა ფრად შეღებვა და მოხატვა დაიწყეს.

სააღდგომო კვერცხები უნდა შეიღებოს წითელ პარასკევს. კვერცხების წითლად შეღებვის შემთხვევაში უმჯობესია შეარჩიოთ მომცრო და მუქი ფერის კვერცხი, უფრო სქელი ქერქი აქვთ და ხარშვის დროს ნაკლებად დასკდება. საუკეთესო მაინც სოფლის კვერცხია,მაგრამ დარწმუნებული უნდა იყოთ კვერცხის სიახლეში. კვერცხი ყოველთვის შეღებვამდე კარგად უნდა გაირეცხოს და უნდა იყოს ოთახის ტემპერატურის და არა მაცივრიდან ახლად გამოღებული.

ხარშვაში ჩამატებული მარილი კვერცხს სიმაგრეს ანიჭებს, ხოლო ძმარი სიპრიალეს.

წითელი კვერცხების ბუნებრივი საღებავით შესაღებად აიღეთ ენდრო და მუქი ფერის ხმელი ხახვის ფურცლები . (შეიძლება მარტო ენდროც და მარტო ხახვის ფურცლებიც) ერთი შეკვრა ენდრო კარგად გარეცხეთ, დაჩეჩქვეთ, დაამატეთ იგივე რაოდენობა ან რამდენიც გაქვთ ხმელი ხახვის ფურცელი, დაასხით 1-1,5 ლიტრი წყალი, 1 ჩაის კოვზი მარილი, 1 ჩაის კოვზი ძმარი და ხარშეთ 15 20 წუთი.

როდესაც ეს ნახარში, კარგად, მთლიანად გაცივდება, ჩაალაგეთ შიგ კვერცხები, ისე რომ ერთმანეთს არ ეხებოდნენ და ჩამალეთ ენდროსა და ხახვის ფურცლებში თუ წყალი საკმარისი არაა, დაამატეთ კვერცხების დაფარვამდე. ჩაყარეთ ერთი ჩ.კ. მარილი და ჩაასხით ცოტა ძმარი. შემოდგით ნელ ცეცხლზე და ადუღების მერე ხარშეთ 12-15 წუთი. ამოალაგეთ კვერცხები და გააციეთ.შემდეგ შეგიძლიათ ზეთიანი ბამბით გააპრიალოთ.

გაითვალისწინეთ, თუ კვერცეხბის სხვადასხვა ფრად შეღებვა გსურთ, არ გამოიყენოთ სოფლის ყვითელ ნაჭუჭიანი კვერცხი, ასეთ შემთხვევაში თეთრი თხელ ნაჭუჭიანი კვერცხი ჯობია აირჩიოთ.